05/10/2023
Ayiti Konte sou mwen, kisa li ye?
se yon pwojè sosyal, yon revèy konsyans nasyonal ak yon rezireksyon pou Ayiti.
Ayiti konte sou mwen, dwe enplike chak grenn Aysyen kelkeswa kotel ye nan mond lan, men li plis konsène Aysyen kap viv Ayiti yo, lè nou konsidere batay pou chanje peyi a dwe komanse avèk yo menm.
Kijan mouvman sa karakterize?
Ayiti konte sou mwen, gen plizyè etap, men etap nimewo 1 an, ki pi enpotan pou nou: Nap mande tout Aysyen alawonnbadè sispann pataje vye imaj sa kap pase nan peyi a.
Nou ka toujou bay enfòmasyon, nou ka toujou wè enfomasyon men li pa nesesè pou nap montre kadav, moun yap boule, pil fatra, bèt kap manje moun. Imaj sa yo pa bon pou peyi a, E yo retade nou anpil anpil, yo fè nou parèt rize epi kanibal mond lan.
Ki efò kap fèt pou nou ta fè sa yo respekte?
Nou pa gen bagèt majik, se pa nou menm ki bay moun yo kob pou fè entènet ni pou achte tel. Nou paka di yo sa pou pataje oswa non. Men nou fè plis pase 10 dènye ane sa yo ap vann vye imaj peyi a men vwala ki Kote nou ye jounen jodi a.
Nou rankontre plizyè moun nan peyi a granmoun kou timoun ki fè depresyon, anpil ladan yo eksplike se akoz move imaj yap gade sou estati tel moun ki nan kontak yo, sou rezo sosyo yo elatriye.
Nou konsyan telefon Ou se paw, se ouk achtel ak lajanw, menw paka anpeche moun ki nan kontak Ou yo gade estatiw.
Se sak fè li enpotan pou nou vann lòt imaj peyi a konsa sa ka bay espwa avek moun ki nan kontak ak antouraj Ou.
Konsa, premye etap sa, se mande chak grenn Aysyen pataje bèl zòn, sit istorik nou yo, bèl manje nou yo, Ansyèn imaj peyi an. Sa yo kapab pote Lespwa, limyè ak rekonsilyasyon sou Ayiti.
Pou moun kap bay enfòmasyon yo, eske yo dwe kanpe?
Non, Kelkeswa moun nan jounalis ou pa kapab toujou kontinye bay enfomasyon, men sèlman nap mande yo fè jefò pa pataje vye imaj sou peyi a.
A chak wap bay yon enfòmasyon, ou refize lage vye imaj Peyi an. Ou ka sèlman ekri konsa tout moun va wè, wap pwoteje imaj peyi a.
Ex: si gen yon bwa kale ki bay nan yon zòn. Moun nan kap bay enfomasyon an ka toujou di tel zòn te gen yon bwakale, men li pa bezwen lage imaj Kote yap lapide oswa mete dife sou moun yo, sa gndwa pa rive Sou ou dirèkteman men chak yon etranje wè sa, li diminye valè nou kòm moun.
Ki lòt etap ki genyen nan mouvman Ayiti konte sou mwen an?
Nan pwoje Ayiti konte sou mwn an, gen plizyè etap. Lòt bagay ki enpotan sèke nou pral ankouraje jenès la pou swiv jèn kap fè bagay pozitif, kote yo ka aprann e ki ka ede peyi a avanse, nou remake anpil jèn tonbe nan fè move zak, se paske dènye jou sa yo sosyete a plis bay vizibilite ak sak pa bon. E pa gen okenn sosyete ki kapab vanse si jenès la pa gen modèl e sil pa konnen kotel vle ale.
Jodi a nou denonse pi gwo plan jenès Aysyen nan se yon plan entènèt 9 goud. Nou denonse tou se Ayopò a ki wout siksè jenès la, nou denonse tou pou yon seri de moun krabinnen panse jenès la ak dè fen pèsonèl.
Ex: nou ka supotè sou rezo yo jèn ki gen talan, kap fè pwomosyon pou sak bon olye nap swiv yon seri de moun sou rezo yo kap di betiz. Menm jan, lè jounalis antre nan fakilte yo se pa pou toujou Al poze etidyan yo kesyon sou kiyes ki pral boule kaotchyou, men nou ka poze yo kesyon sou sa kap prepare memwa yo, ki sijè yo te chwazi.
Kisa ki ?
Sa se pati ki pi enpotan nan pwojè a. : nou konsyan nou pedi 10 denyè ane sa yo. Nou pa realize anyen, tout pwojè nou yo tonbe akoz enstabilite tout kalte peyi a. 365 sa, fè referans avek 12 mwa, 52 semèn nan yon ane. Donk nap fè 365 jou sakrifis pou nou pataje bon bagay sèlman sou peyi a.
Se tankou yon challenge, men se pa vrèman sa. Chak jèn pral bay tèt yo objektif, chak jou a pati 17 oktòb 2023 dat lansman kanpay sa, pou vann imaj peyi a, pou sipòte jèn pozitif kap fè bon bagay, e pou sispann ankouraje vye bagay sou rezo yo.
A chak pòs wap fè, chak sa wap ekri sou estati ou, chak enfòmasyon wap bay, nan kayew, nan machin ou. Nan mayow, chak jou sou telefon ou, sèlman ekri .
Sa se misyon paw, angajman paw ou pran, batay paw, detèminasyon paw pou peyi a kòmanse pran yon lòt direksyon Aprè 365 jou sa.
E lè sa wap di sa se kontribisyon paw, lèw komanse wè tout Aysyen komanse pran konsyans.
Si gen moun ki di peyi sa pap janm chanje, si gn moun ki di nap pran 50 lane avanl chanje, si gen moun ki di ak modèl jenès sa, nou pap fon pa. Men nou menm a travè konviksyon e konsyans nou, ak lafwa nou sèten Ayiti ka chanje kounya
Kisa ki anndan pwojè a, ki ka ede jenès la rete konekte ak ideyoloji a?
Ayiti konte sou mwn, chaje ak pwogram: Nap pale avèk jèn yo Atravè medya yo chak mwa, nap fè update pou nou di men kijan pwojè an ap vanse.
Nap fè konkou Tèks, Chan, Pwezi, netwayaj katye ki pi bèl, Nap kòmanse komemore dat istorik nou yo nan lekòl yo pou nou ka kenbe jènes la nan aktivite pozitiv.
Eske pwojè sa plis konsene jèn Ayiti yo?
Ayiti konte sou mwn, se pou tout Aysyen nan mond lan, men jènes kap viv Ayiti an plis konsène. Ex: Anpil emisyon ki gen betiz, ki pap ede sosyete a avanse nan okenn sans se Aysyen aletranje ki fè yo, men kiyes ki konsome yo?? Se Aysyen Ayiti yo. Fòk gen yon moun ki ka di yo sispann. Mesye/Dam rezo sosyo laba yo, yo gen yon vi estab yo menm, yo nan peyi ki gen eta de dwa, yo Al travay, yo gen kouran, entenèt. Yo gen lwazi ak sekirite Aloske jèn Ayiti yo ki konsome betiz yap fè oswa di, pa gn youn nan sa yo. Sèl sa yo genyen se souf la ak espwa yon jou ya vwayaje tou.
Si nou pran Majorite zen ak buzz ki genyen sou rezo yo, se menm moun sa yo, ki fabrike yo nan laboratwa a letranje. Kiyes ankò ki fè yo mache? Nou menm an Ayiti. Kisal itil? Yo pa konnen.
ki anpil ladan yo pa konnen.
Donk youn nan fason pou supote pwojè sa, e batay pou chanjman. Se vann tèt ou pito, vann bon imaj peyi a epi fè pwomosyon pou jèn kap ede peyi a avanse, fè pwomosyon pou sa ki pozitif.
Kijan nou pral itilize atis yo nan mouvman sa?
Jan nou toujou dil, pa gen yon bagèt majik pou fòse yon moun antre nan mouvman, men nou panse se yon mouvman ki pa politik, ki plis sosyal, mantal ak entelektyèl kèlkeswa moun nan ka patisipe.
Nou remake gen anpil atis depi kriz la fin anraje a ki tou anandone Ayiti, swa ki an frans, sendomeng, Etazini, Kanada etc…
Anpil ladan yo pa pran pozisyon sou sa kap pase nan peyi an, aloske nan kanaval, nan bal lè peyi a te bon se sou do menm pèp sa yo drene popilarite yo.
E nou paka konprann, menm pandan Ayiti an danje anpil nan atis sa yo kache laba epi yap fè mizik voye bay jenès la gouye nan mizè ak ensekirite. Sa inakseptab. E nap mande kisak nan tèt jenès la kel paka wè, li paka danse nan mizè sa. Donk se sak fè nap lanse apèl la e atis ki vle kolabore yo nap pwopoze yo fè mizik angajman, kap pale pou pèp, ankouraje jèn yo Al lekol. E soti nan dat 17 oktob la nap komanse mande jenes la poul koupe fache avek tout atis Malgre jan peyi an ye la ki kontinye ap fè pwomosyon pou vyolans, kap choute sou fanm oswa kap fè ensitasyon. Nan sa nou ye la, pa gen plas pou mesaj sa yo ankò.
Nou deja pale a plizyè atis ki adere ak ide a.
Kiyes ki dèyè mouvman sa?
Ayiti konte sou mwn, pa gen mèt. Si Ayiti konte sou yon sel moun anyen pap chanje. Li dwe konte sou tout Aysyen nan mond lan. Se sak fè nou mande chak grenn moun sispann pataje vye imaj peyi an. Ann vann bel Kote, bel bagay ki gen nan peyi a.
Se yon ekip sitwayen konsyan, ki panse peyi a paka rete konsa e ki kwè pou Ayiti pa peri fok li konte sou chak grenn moun.
Ayiti konte sou mwn. Li konte sou Ou. Li konte sou li, li konte sou nou tout.
Eske nou prezan sou rezo sosyo yo?
Rezo sosyo yo enpotan anpil, mond lan pi bèl a teknoloji, sitou lèw konn kijan pou byen itilizel: Ayiti konte sou mwen prezan sou FB, TikTok, Youtube, Tweeter. Sou yon sel nom Ayiti konte sou mwen, kote nou envite tout moun rete konekte avek nou. Abone a tout chanèl nou yo.
Nap tou pwofite mande kelkeswa Aysyen an ki gen bel imaj bò lakay li, nan zòn li. Nan lekol li, nan travay li. Pa neglije, Nenpot imaj ou ka jwnn sou peyi an. Patajel avek nou. Konsa nap pibliyel sou diferant paj nou yo pou lòt moun ka vin komante e apresye mèvèy peyi a.
Kilè lansman ofysyèl pwojè sa?
Pwojè sa ap komanse nan dat 17 oktòb 2023. Kom se yon pwojè ki pote espwa pou peyi a, se enpòtan kel lanse nan yon dat senbolik.
Ayiti konte sou mwen,sil gen yon dat komanse lap gen yon dat poul Fini, eske lap dire 365 jou?
Sa pa vle di, pwojè a ap dire 365 jou. vle di a pati 17 oktòb sa, tout sa map fè map konnen mwn gen yon travay poum fè pou aprè 365 jou poum komanse wè pèp Aysyen pran konsyans pou chanje peyi sa.
Eske nou atann vre Ayiti ka chanje Aprè 365Lan?
Ayiti ka chanje demen maten, si nou leve epi tout Aysyen pran konsyans Ayiti ap chanje demen maten. Pi gwo pwoblem nan se konsyans. E se jisteman konsyans sa nou bay tet nou misyon pou nou jwnn nan 365 jou an.
Konbyen moun pwojè a sible?
Pou chanje peyi sa, pèson paka rete deyò. Nou sible tout Aysyen anndan kou deyò. Nou ap tann pou pi piti 10 milyon Aysyen adere a mouvman paske tout Aysyen ta renemn wè peyi a chanje.
Pataje, Abone, sipòte, konsyantize
Ayiti konte sou mwen
.
