08/11/2022
Du’aan Boqachuu Kabajamoo Aartistii Dr. Alii Birraa Ilaalchisee Ibsa Gaddaa Paartii Koongirasii Federaalawaa Oromoo
******
Paartiin Koongirasii Federaalawaa Oromoo du’aan boqachuu hangafa aartii Oromoo kan ta’e Dr. Alii Muhammad Muussaa (Alii Birraa) tiin gadda cimaa itti dhagahame ibsaa, maatii hiriyoota akkasumas ummata Oromoo fi Itoopiyaa hundaaf jajjabina hawwa. Guyyaa har’aa Oromoo fi biyyi teenya Odaa aartii isaa guddaa fi mul’ataa ta’etu jalaa jige, kanaaf miira gaddaatiin haguuggamee jira.
Guyyaa jiguu Odaa aartii guddicha kanaa irratti gadda qofa otuu hin ta’in jiruu mikii walakkaa jaarraa bira darbee fii gumaacha inni biyyaafi ummata isaatiif godhe yaadachuu qabna. Alii Birraa urjii aartii Oromoo Baha Oromiyaa irraa argame; hundeessitoota baandii Afran Qalloo keessa tokko yoo ta’u ibsama hafuura hawwii saba keenyaa bilisummaa, walqixxummaa, haqaafii tokkumaaf qabuuti. Aliin calaqqisa daangaa ol aanaa jaalalaa, namoomaa fi Oromummaati. Muuziqaan isaa bu’uura dhaha sirba aadaa Oromoo otuu gadi hin lakkisin ammayyooma goonfachiisee aartii Oromoo sadarkaa hedduu kan olkaaseedha.
Aliin sirboota labata tarkaanfatan saniin xiinsammuu tokkummaa Oromoo kan ijaare yoo ta’u; adaa, afaan, seenaa, sirna, sona, qabeenya fi miidhagina uumamaa Oromiyaa aduynaaf beeksisee jira. Aliin sirboota isaatiin cunqurfamtoota mirgaaf akka falmatan kan kakaasu, eenyummaa isanitiin akka boonan kan jajjabeesu ture. Aliin ergaa jaalalaa, qabsoo fi namoomaa isaa afaan torbaan kan weellise, dhaloota dammaqsee fi aartiistoota Oromoo fi Itoophiyaatiif fakkeenya guddaa, galaa si’aayinaa fi jaboomaa ta’ee jiraate,ni jiraatas. Kana males, sirboonni Alii, haada jabaa ummata Oromoo biyyoota ambaa jiraatu biyya dhaloota isaa fi maatii isaa waliin miiraan walitti hidhanii dha.
Aliin gola onnee saba Oromoo hundaa kessaa bakka guddaa qaba. Dhiibbaan faana isaa yaadannoo gadi fagoo dhaloota ammaa fi dhaloota dhufu keessatti bocamee hafa; bara baraanis ni yaadatama.
