12/06/2024
Naaxigeh nanu nek qaki edde yan gambi
Naaxigeh sugay inkih abnu cinnakkah
Inkih aaxagih inkih abnu cinnakkah
Nek qaki edde yanim mala alle waynaama
Naagatat qaki kak yanim mala boola
Makko yangalen inki geyto yelleenik
sittalih raban inki cakki yelleenik
inki geyto likih gariiy tu celsiisa
inki cakki likih lafaay rikel raqta
Tah garuuy riket edde nek geyan boola
Tah mala wayat elle nee ganan gurra
Meysitaanamak assacakke ken cinna
Racmataamak ni baati naamo kah gaadam
Nee ganan ni qaril neh edde asan makkot
Nee qidan ni garil neh arbaqan karrat
Innam alle mawayna makko waynakkah
Abnam alle mawayna loowo waytakkah
Loowo wee numow edde yerde deerolih
Gicma wee numow elle yekke kallaytol
Nagra wee numow abba akah cabem mangih
Asta wee rasow edde yan dahab duudah
Duuda gadda likih nanu edde nan baacay
Nee xiqaagat anih nanaakah asna asway
Ninnim aagime waah ni baaxo wayta astay
Giclok afraqewaah nanu edde nan xukkoy
Rabte labhak nanu edde raqna farrintoy
Tatre baadak nanu elle raqna xexxaaroy
Matre waynuh gari edde debrimaakootay
Ayro le ardil silal le gabla sugtammay
Rob radaamah qabar le baaxo raqtammay
Naaxigeh qabar edde raaqa fallakka
Gubba yangih giba edde sugta fallakka
Nek qaduwwi foxo edde yable fallakka
Maagamin giti taaxigekke fan baaham
Maagimin giba taaxige aracat sugtam
Maadu sinni rasuy gariiy amol hirga
Makko sinni maray gariiy tu kah warsa
Nek garuh dite le uddur ayro warsaana
Nek garuh mala ugra lekke bahaana
Baali oh gune yakkaleeh ganot cabta
Nek garu gibah adda lekke tayseyyan
Neh mataysay neh ayse leemi nek yaana
Neh taysem giba ninnih elle haynakke
Neh xayim foxo ninnih edde nablekke
Yalli kaah racmatay cuseen qali gayrano
