07/08/2022
Humnoonni mootummaan Waraana Bilisummaa Oromoo fakkeessee bobbaase uummata saamaa, ajjeesaa fi hiraarsaa jiraachuun himame.
Jiraattonni aanaalee godinaalee Shawaa Lixaa, Shawaa Kibba Lixaa fi Shawaa Kaabaa OMNf yaada kennaniin nuti miseensota WBO ni beekna jedhan.
Miseensonni Waraana Bilisummaa Oromoo naamusa gaarii akka qaban ni beekna kan jedhan jiraattonni, qorra, roobaa fi beela dandamatanii saba bilisa baasuuf qabsaa'aa jiruu jedhan.
Miseensonni WBO uummataa naamusa barsiisu, guyyaa guyyaan oolmaa isaanii ni beekna kan jedhan jiraattonni, Waraanni Bilisummaa Oromoo naamusa jabaa qabuun uummata waliin waliigaluun mootummaatti mataa bowwoo akka ta'e himaniiru.
Mootummaan WBO uummata irraa gargar baasuu dadhabnaan toftaa biraan akka dhufe dubbataniiru.
Kanaanis bakkeewwan garaagaraatti humnoota isaa Waraana Bilisummaa Oromoo fakkeessee bobbaasee uummata gidirsaa, saamsisaa fi ajjeesaa jiraachuu dubbataniiru.
Aanaalee Amboo, Gindabarat, Waliso, Ammayya, Wancii, Gooroo, Abunaa Gindabarat, Meettaa Roobii, Warra Jaarsoo, Kuyyuu, Darraa, Dirree Incinnii fi kanneen birootti humnoonni mootummaan WBO fakkeessee bobbaase saamicha, ajjeechaa fi gidiraawwan garaagaraa uummata irratti raawwataa jiraachuu jiraattotatu himate.
Gochaan kun uummanni WBO akka jibbu gochuuf kan wixiname akka ta'e immoo qondaala nageenyaa mootummaa tokkotu OMNtti hime.
Qondaalli nageenyaa olaanaan mootummaa maqaan isaanii akka hin dhahamne barbaadan kun akka jedhanitti, qorannoo mootummaan taasiseen WBO fi uummata gargar baasuun hin danda'amne yaada jedhurra gahame.
Toftaaleen WBO fi uummata humnaan gargar baasuuf itti deemame milkaa'uu dhabuu isaatiin WBO fakkaatanii uummata hiraarsuun uummata WBO jibbisiisuu tarsimoon jedhu dursummaan fudhatamee jedhan qondaalli kun.
Mootummaannis tarsimoo kana hojii irra oolchuuf humnoota isaa kumaatamaan WBO fakkeessee guutuu Oromiyaatti bobbaasuu qondaalli nageenyaa olaanaan kun dubbatu.
Warri godinaalee giddugala Oromiyaatti uummata hiraarsaa fi saamaa jiranis warruma mootummaan bobbaase kanaa jedhan.
Miseensi paarlaamaa fi kan biltsiginnaa obbo Hangaasaa Ibraahim tibba darbe mootummaan humnoota isaa WBO fakkeessee akka bobbaasee fi dararaan uummata irra gahus warra kanaan kan raawwatamu ta'uu dubbatanii turan.
Odeeffannoo dabalataa hidha kanaa gadiin argattu
https://omnglobal.com/or/14279/