26/04/2023
صابلي شوكولا ومحشي بالنيستلي كاراميل 😋😍
بنين ويجي يذوب فالفم 😍😍😋😋
المقادير : 🥰
500غ زبدة طرية
6 ملاعق ك زيت
كاس سكر غلاص
4 بيضات (زوج كاملين و زوج صفار)
ملعقة ص لافاني
كاس نشاء الذرة
2 ملاعق ك كاكاو بني
1 خميرة الحلوة
فرينة حسب الحاجة .
طريقة التحضير: 🥰
في اناء نحطو الزبدة مع السكر والزيت ونخلطو بالباتور حتى يولي قوام كريمي ومبعد نزيد عليهم البيض ولافاني ونخلط مليح حتى يتجانسو المكونات مع بعض، مبعد نزيدو النشاء والكاكاو ونخلطو ومبعد نزيدو الفرينة معاها باكي خميرة الحلوة ونلمو العجينة ، ماتعجنوهاش لموها برك حتى تتحصلو على عجينة طرية ومتماسكة .
خلوها ترتاح شوية فالثلاجة اذا سخون الحال ، ومبعد اجبدوها اقسمو العجينة وحلوها بالحلال ماهي خشينة ماهي رقيقة ( ديرو ساشي من فوق وساشي من تحت ) تجيكم اسهل.
مبعد اطبعي بالشكل لي حبيتوه و طيبوهم ويلزم الفرن يكون مسخن شوية من قبل ،
(الشكل يكون الجهة لي من تحت حبة نورمال وجهة لي من فوق حبة مثقوبة )
وبعد مايطيبو لسقوهم بالنيستلي كاراميل صنع منزلي يجي بنين على تاع برا ومايسقمش، ومبعد تعمرو تاني هاذيك الفتحة بالنيستلي، ولازم تكون متساوية السطح باه ماتجي هابطة ماتجي طالعة ، وتخليوهم ينشفو شوية سوى في فالثلاجة ولا برا في بلاصة باردة.
مبعد في حمام مريم تذوبي شوكولا دادا بالحليب وتزيديلها الزيت وتخلطي حتى تتجانس معاه، وتڨلاصي الحبات تاعك كامل . (كل 100غ تساويها م ك زيت) 😋😍
والتزيين اختياري 😊
وبالصحة والراحة. 🌹
