Oussama Tebani Idris

10/04/2024

عيدكم مبارك ❤️ تقبل الله منا و منكم و غفر لنا و لكم
كل عام و انتم بخير و كل عام و انتم زاهيين و باهيين ينعاد عليكم بالصحة و الهناء ان شاء الله 🤍

03/04/2024

الفيديو هذا عاودت حطيتوا لقيت فيه مشكل 😅❤️ الرابط في التعليقات

02/04/2024

اولاد باديس 🏞️ منطقة هايلة ربي يبارك 😍 الطبيعة العذراء فيها وديان وشلالات و فيها قمة السرج لي نديروها ان شاء الله و يكون فيها تخييم
المهم الخرجة هذي مكانتش مبرمجة داير في بالي بلي نجيو توال الواد و نديروا ڨعدة أيا رحت بسروال و طحت فالغرڨة 😂😂 تبهدل الواحد و خلاص
المرة الجاية ان شاء الله نزوروا فيها الجهة الاخرى و القمة لانوا من ثم تدفق المياه خير على حساب واش ڨالونا
المهم هذي واحدة من المناطق الماشي معروفة و لي مراك رايح تلڨى فيها لا قرعة لا شاي لذا بلاما نهدروا على النظافة 😀

31/03/2024

اجمل منظر فالدنيا 😍🌅

هذي المناظر مباشرة بعد ما كنا في بيئات صحراوية ، الجزائر 🇩🇿❤️

29/03/2024

و بهذه الصور تكون نهاية سلسلتنا " دعسوقة نحو بوابات الصحراء الجزائرية 🏜️"
ويناه لبلاصة لي عجبتكم بزاااف و في اي ولاية ؟
انا كامل عجبوني 😁😅 المكان لي كان زايد شوي هو "الواد الابيض في مشونش 🌴" لانوا طبيعة جديدة و منظر نشوفوا لاول مرة
على كل حال الحمد لله على كلش و ان شاء الله تكتبلكم زيارة هذي الاماكن لانوا هذاك هو الهدف من مشارتكم كل هذا و كيما نوصيوكم ديما اذا رحتوا حافظوا على هذه الاماكن و فيها خير ان شاء الله
هي درت قرار باش نحبس خلاص ( ماشي بصفة تامة ، بصح اذا عجبتني الحالة بلا بارطاج نحبس طول 😂)
المهم كاين وحد الرحلة هكذا خفيفة ثاني درتها بلاك نزيد نبارطاجيها معاكم و تكون هذيك هيا النهاية وخلاص ... على كل حال هذي هيا كاين هذوك الشوية لي يدعموني ديما حبيت نوضحلكم و ربي يحفظكم على كلش ❤️ ، البقية انتم خاطيين 😀

26/03/2024

السؤال : لاه تروح بيها مدام علابالك بلي رايحة تحبس ؟
الجواب : تفاؤلوا خيرا تجدوه ، ولي ناوي الخير يلڨى الخير وزيد يخي كل حاجة عندها حل 😀 مالا ربي و رحمتوا اتكل على ربي و ماتحسبش بزاااف فالدنيا هذي الكاتبة تلحق و لي يخاف مايدير والوا , هذي فالدنيا كامل ماشي غير في هذي
انا عجبتني غير اللقطة كي حصلت بينا فالرمال 😂😂 لوكان غير رمل طالعين خلي ههههه
ربي يرزقنا و ويرزقكم ان شاء الله من فضله ❤️
شكون عجباتوا دعسوقة فالفيديوهات من داخل 😍😁 ماتعبتش عليها هذاك الشئ هذاك كامل في باطل ، ولا واش ڨلتوا ؟

25/03/2024

شرفات غوفي منطقة سياحية تاريخية 🇩🇿😍
بلاصة قوة تاع الصح ، صنفت شرفات غوفي منطقة أثرية ومحمية وطنية كما اختارتها "اليونيسكو" تراثا عالميا محميّا، بناها الأمازيغ قبل أربعة قرون لكنّها لا تزال صامدة رغم ما تركه الزمن عليها من آثار جعلت الكثير من بيوتها أطلالا
و كيما نعرفوا بكري كانوا يستقروا وين كاين الواد و بهذا كان هذا المكان الانسب لانوا كيما حكالنا واحد ثم قالنا كان المنسوب تاع المياه طالع و كان فيها حتى الحوت ثما
بالإضافة إلى انهم قدروا يستغلوا ذلك في الفلاحة
و باش تكون علابالكم عندها حوالي 4 قرون من لي بناوها و لحد الان مزالوا كاين ديار كيما راهم
الحاجة المليحة انك تروح و تحافظ عليها لانوا مكان سياحي بامتياز
كاين وحد لبلاكة ثما معجبتنيش ( هنا رمي الفضلات ) و تقريبا في الواد و في الوسط كي تهبط ، ان شاء الله تلحق للمعنيين و ينحويها من ثم لانوا ماهيش بلاصتها و زيد لي يروح ثما يعاود يهز الفضلات تاعوا ماشي يخليها ثم ...
بغير ذلك منطقة قوة كيما ديما نڨلكم انا الاماكن التاريخية نحب نزورهم 🤍

#الجزائر #باتنة

23/03/2024

سبحان الله الخالق المبدع 😍🇩🇿
من داخل الواد الابيض في مشونش
هذا المكان تحفة ربانية ننصحكم باش تزوروه راح تتمتعوا صح 🤍

22/03/2024

الحمد لله رانا ولينا 9 الاف مابقاش على 10k ربي يحفظكم كامل على الدعم ❤️

I've just reached 9K followers! Thank you for continuing support. I could never have made it without each and every one of you. 🙏🤗🎉

21/03/2024

الحلقة الثالثة راهي فاليوتيوب ❤️

21/03/2024

صحا فطوركم 🤍
مشونش 🌴🏞️ واحدة من أجمل الاماكن لي تقدر تزورها في ولاية بسكرة ،فيديو الحلقة الثالثة راه فاليوتيوب ❤️

#مشونش
#بسكرة

20/03/2024

واحدة من أجمل الطرق لي تقريبا كامل جنان النخيل الدوسن_طولڨة باتجاه بسكرة 😍🌴

#بسكرة #طولڨة

19/03/2024

الحلقة الثانية ❤️
الرابط في التعليقات

18/03/2024

ادعيولنا معاكم الدعاء مليح في الساعة الاخيرة قبل الفطور و لكم بالمثل ❤️
هذي الطريق تعد واحدة من أصعب الطرق لي مشاتها دعسوقة 🏜️
راح نشارك معاكم فيديو الحلقة الثانية من ورا الفطور ان شاء الله
صحا فطوركم 🤍

17/03/2024

Da3sou9a in the Golden sands 🏜️😍

sert

16/03/2024

عرڨ السيوف 🏜️ بلدية الخبانة _ المسيلة
منطقة ننصحكم باش تزوروها اكدولنا على النظافة من وراكم ربي يحفظكم
كاين بزاااف تصاور مالڨيت واش نحط واش نخلي المهم اكدولي الاخيرة 😅😁

15/03/2024

الحلقة الاولى من السلسلة راهي فاليوتيوب ❤️

14/03/2024

فيديو مختصر لكامل السلسلة لي راح تكون فيها 4 حلقات ولا 5 المهم الفيديو في اليوتيوب و رابط راه فالتعليقات ❤️
صحا فطوركم

10/03/2024

بوسعادة مدينة السعادة 😁
بعد طاحونة فيريرو توجهنا لطالى مسجد البشير الابراهيمي تحفة ربي يبارك ❤️ للأسف كان مسكر ولينا صلينا على برا و مبعد رحنا لسوق الصناعات التقليدية تاع بوسعادة تلقاو ثما حوايج مصنوعين باليد و من بينهم السكاكين البوسعادية جولة خفيفة ثما درنا كاس اتاي و باسط حب يشرب هذيك القهوة الخاصة بيهم "الجزوة "
و تكلنا على ربي مباشرة للمكان لي بتنا فيه لي يعتبر اقرب مكان للعاصمة تتواجد فيه الرمال 🏜️
يتبع ...😅 راح تشوفوا كلش في اليوتيوب

09/03/2024

طاحونة فيريرو بوادي بوسعادة
معلم سياحي تاريخي ، تقع على بعد 02 كلم بوادي بوسعادة بقايا طاحونة قديمة بناها أنطوان فيريرو أحد الإيطاليين المولودين بمحافظة طورينو في 28 سبتمبر 1849 والذي هاجر إلى الجزائر خلال العام 1867 حيث نزل ببجاية واشتغل بمختلف الطواحين قبل أن يقوم بإنشاء طاحونة بوسعادة التي أطلق عليها طاحونة فيريرو نسبة لمنشئها، كما امتلك طاحونة أخرى بالمسيلة أطلق عليها اسم طاحونة الورود، أين قام باختيار أخيه ديني فيريرو وريثا له

بفضل مجاورته شلالات رائعة والتي كانت في الماضي تشكل الطاقة المحركة للطاحونة
مكان هايل و سياحي لكن للأسف لازم يكون هناك ترميم و نظافة كيما كل بلاصة

#بوسعادة
#المسيلة

07/03/2024

جماعة كاين بزاااف تصاور 😁😂 رايحين تكرهوا مني
مزلت ماطلعتش كلش باش نبدا نبارطاجي معاكم
و قبل مانبداو رايح نطلب طلب منكم باش تبارطاجيو و تتفاعلوا باش نزيدوا نكبروا شوي ❤️
المهم التنوع لي كاين في الجزائر و الله ماتلقاه ، غابات صحاري جبال بحر واش تزيد 😍
رابط الانستغرام راهوا في التعليقات راه عدد المنشورات قريب يلحق عدد المتابعين 😂😂

06/03/2024

الجزائر القارة 😍❤️ تخيل ان الفرق بين الصورتين هو اقل من 24 ساعة وين كنت فالثلج و غدوة كنت فالكثبان الرملية ، درت فيها رحلة تعرفت فيها على عدة اماكن و بالطبع رايح نشارك معاكم كلش
عندي بزاااف مادرتش رحلة فيها بزاف بلايص هكذا 😁 المهم رايح نشاركم معاكم كلش غير نريح برك

02/03/2024

كي يكون البرد يڨطع فيك و انت لاعبها لباس باش جي تشبه فالتصويرة 😂 المهم كنت ندور شفت ثلج حاكم مليح يطل عليك جبل مڨرس من بعيد ، أيا و نتكل على ربي و نجيبها ثم ، المهم خيرات كبيرة ربي يبارك 😍
ماشي باش نطيحلكم خشين بصح مع الوقت كي تتعلم تولي تعرف بلي هذا اللباس كيما راني لابس ماهوش كامل تاع هذا الجو لازم تكون مكبط 😂 هذي بدون برنامج بانتلي رحت وخلاص و ماطولتش
اذا كنت في زيارة لهكذا اماكن لازم العتاد الخاص بيها
كيما فالتصويرة الاخيرة في نفس المكان و شوفوا الثلج لوين واصل بصح تكون مرتاح
بلاك نديرلكم فيديو خاص بالعتاد واش رايكم ، جامي ديت رايكم في حوايج ولا جاوبتكم على اسئلة خاصة في هذا الجانب 😅 اعطيوني اسئلة ولا استفسارات بالنسبة للناس لي مهتمة و نحاول نديرلكم فيديوهات مستقبلا ان شاء الله على حسب معرفتي لاني منيش مختص بصح الانسان راه يطور مع الوقت
المهم النصيحة لي ننصحهالك جامي لا تروح بسروال و سبادري 😂

18/02/2024

ولينا 8٫5 الف 😁 مابقاش للعشرالاف ان شاء الله
شكرا لكم جميعا ربي يحفظكم 🤍 اذا تحبوا ديروا دعوة للاصدقاء 10 من كل واحد نوليو 50 الف ماش حتى 10 الاف ، المهم ربي يحفظكم و ان شاء الله نكونوا عند حسن الظن ❤️

I've just reached 8.5K followers! Thank you for continuing support. I could never have made it without each and every one of you. 🙏🤗🎉

18/02/2024

‏"اللهم إني أعوذ بك من أن أفقد شغفي ، ومصادر بهجتي ، وحبي للحياة ، أعوذ بك من دربٍ أسير فيه بلا جدوى ، ومن حُلم أتعلّق به ليس لي ، ومن زرعٍ أتعب عليه بلا ثمر ، من يأسٍ يُخيّم عليّ ، ومن حُزنٍ يحجب النور عن عينيّ ، ومن هَمّ يُثقِل كاهلي"

14/02/2024

ميلة القديمة 🇩🇿😍
انا واحد من الناس نحب بزاف الاماكن القديمة لي تحس فيها بوحد الشعور و تتساؤل كيفاش قدروا هذوا الناس يبنيو اماكن مثل هذوا بادوات بسيطة قدرت تبقا لقرون عديدة
خاصة الرومان وين تروح تدور تشوف رايح تتعجب صح
و في هذا المكان بذات راهم عڨبوا العديد من الحضارات راني عطيتكم شوي معلومات في الفيديو لي من بينها أنه فيها اقدم مسجد في الجزائر و الثاني في المغرب العربي بعد مسجد القيروان في تونس و اقدم عين في افريقيا لي داروها الرومان

13/02/2024

10/02/2024

Do what makes you HAPPY and just live your own life as you like ✌🏼

ديرو واش كاين في راسكم و ما تتقيدوش بتفكير الآخرين، كل واحد فينا منفرد على الآخر، كل واحد فينا عندو طريقته الخاصة ليكون سعيد و يصنع نجاحه عيشو واش راكم حابين حاربوا من أجل الوصول إلى الأشياء التي تجعلكم سعداء، كل واحد فينا عندو حوايج ملاح في حياتو و حوايج عيانين، كل واحد فينا ربي نعمو بحاجة لي بلاك أنا نتمنى تكون فيا و العكس صحيح كاين لي ربي رزقهم المال لكن بدون الصحة و كاين لي تلقاه عنده الصحة الجسدية لكن ما عندوش المال تلقى كل واحد فيهم يتمنى مكان الآخر بصح آخرتها كل واحد ربي رزقو بحاجة لي بيها يقدر يبني حياته وسعادته بلا ما يريح يقارن نفسو بالغير و لا يسمع كلام الناس
الحمد لله على كلش و فيها خير ان شاء الله ❤️ انا الحاجة لي ديما تحرڨ في ڨلبي علاه الحسابات تاعي ماحبتش تطلع 😪 في حين انو التافهين دايرين حالة بصح ماعليش بلاك شاف فيها ربي الصلاح و مدامها على ربي غير يشتي يتقلق عليها الواحد المهم انك دير حاجة حابها هذاك هو المفيد
Keep smiling 😁