09/03/2024
Ölkəmizdə fəaliyyət göstərən demokratik düşərgə, insan haqları təşkilatı nümayəndələri, tanınmış jurnalistlər, vətəndaş cəmiyyəti nümayəndələri birləşib bu diktator idarəetmə sisteminə YOX deməsə, haqsız yerə şərlənərək həbs edilən şərəfli insanların sayı günü-gündən artmağa davam edəcək.
Bunun da vəbalı sadə xalqda deyil, yuxarıda sadaladığım düşərgənin üzərində qalacaq!
Bunun da çox sadə yolu var.
Heç bir siyasi partiyanın üzvü olmayan, hamımızın rəğbət bəslədiyi, bütün siyasi təşkilatların ədalətinə güvəndiyi bir nəfər zəhməti və məsuliyyəti çox ağır olsa da əlini daşın altına qoyub, bir dənə funksional əməkdaşlıq memorandumu sənədinin tərtibatında və hazırlanmasına start versin.
Ölkədə fəaliyyət göstərən həqiqi müxalif təşkilat və partiya üzvlərindən, vətəndaş cəmiyyəti nümayəndələrindən, şərəfli, dürüst insanlardan ibarət, hər təşkilatdan 1 nəfər işçi qrupuna nümayəndə seçərək (təşkilatların önərdiyi şəxslər) o sənədi hazırlayıb ərsəyə gətirsin.
Elə bir sənəd ortalığa çıxarılmalıdır ki, hər bir kəsim o sənədin tərkibində özünü görə bilsin. Bu təşkilatlar, demokratik dəyərlər çərçivəsində birlikdə alınmış qərarların icrası zamanı heç bir maneə ilə üzləşməməlidir.
Belə olduğu halda, güclər birləşərək Əliyev rejiminə qarşı vahid mərkəzdən adekvat tədbirlər həyata keçirmək imkanı yaranacaq.
Elə bir sənəd ortalığa qoyulmalıdır ki, funksional əməkdaşlıq etməyə çalışan heç kimə bəhanə yeri qalmasın.
"Filan təşkilat varıydı də, niyə orada fəaliyyət göstərmədilər" kimi, fikirlərin də formalaşdırılmaması nəzərə alınmalıdır.
Hər kəs öz təşkilatında, öz birliyində, öz siyasi strateji fəaliyyətində olaraq, vahid mərkəzdən tək adamlıq diktator idarəetməyə qarşı səfərbər halında formalaşan bir sistem oluşdurmaq lazımdır.
Bunun üçün də Azərbaycanda yetərincə şərəfli- savadlı, demokrat insanlarımız var!
Sadəcə əllər daşın altına qoyulmalıdır!
