12/01/2025
M te retisan pou m kòmante sou sa ki pase ant TT ak Janmsotba a paske TT se zanmi m m pa vle gen yon pozisyon ki byeze.
M pa gen anyen pou m repwoche Janmsotba pou sa k pase an, nèg la se nan batay li ye, “La défense est un droit sacré”, li defann tèt li.
Sepandan, ann retounen nan Jenèz sa ki mennen nou la. Pwoblèm 2 nèg sa yo kòmanse akoz de yon videyo Janmsotba te fè kote l te di: “Li kòmanse renmen Barbecue....”. TT pa t dijere sa ditou e li te denonse sa nan emisyon l lan. Mwen panse nenpòt moun ki konsyan de sa gang sa yo ap fè pèp ayisyen an ta dwe gen yon pozisyon parèy.
Barbecue se yon fen kominikatè, li konnen byen pèp lan pa danse kole ak oligak yo ki pa inosan nan malè nou, li itilize sa a kòm zouti kominikasyon pou l atire sou li menm moun l ap toupizi yo ankò. M pa pral di Janmsotba nan gang paske l di “Barbecue kòmanse pran kè l”, paske gen anpil Ayisyen ki pa konn reyalite sa k ap pase Ayiti an ki kwè ke Barbecue ap fè yon revolisyon vre. Donk, li enpòtan pou n presize ke se yon lejète lè w gen Janmsotba ki se yon enfliyansè kit ou vle l kit ou pa vle l, ki kanpe live e di yon kriminèl konsa pran kè l.
Sepadan mwen repwoche TT 2 bagay:
1- Nan yon envestigasyon, lè se ou menm oubyen fanmi w ki konsène, li enpòtan pou w retire tèt ou konplètman nan envestigasyon an e kite ekip ou travay pou ou. Poukisa? Paske lè se ou ki leze an, anpil fwa emosyon ak santiman konn depase rezon. E mwen sèten TT ke m konnen an si se pa t li menm ke sa te konsène, li t ap pran tan pou l byen verifye e konsilte plizyè sous avan menm ke l te vin pale ak piblik lan.
2- M twouve TT te dwe mande pèp lan ekszik piblik san eseye defann tèt li. Pèp lan, mwen fè yon betiz, mwen endwi nou nan erè, mwen mande nou padon, pwen. TT, ou se frè m, men m panse ou bezwen travay sou pwen sa a.
Sepandan, nou tout ap dakò avè m TT se moun li pa pafè, li ka fè erè tou, animozite sa yo mwen wè n ap deplwaye anba pòs li yo, n ap rele l machann mikwo, n ap antre nan manman l, m pa kwè l merite sa. Ban m onèt avèk nou, si TT te machann mikwo, li te ka pèdi diyite l, men m sèten li t ap rich deja, paske anpil nèg ki gen kòb machande mikwo an deja. Se pa nesesite l pa genyen, TT gen yon estidyo li bezwen fè sa fè plis ke 2 an li poko ka fè l, donk ann onèt TT pa machann mikwo, e si n gen evidans kote l negosye mikwo l ak yon moun deja, ban mwen l e m ap monte fè nou ekskiz.
M pale plizyè fwa ak TT deja, m toujou di l m pa wè pou ki rezon w ap ekspoze vi w, vi fanmi w ap denonse yon ekip delenkan pandan ke menm yon bon swivi lapolis pa fè, pandan ke se pi mal peyi an ap vin pi mal, m konn menm ap fè blag avè l m di l ann fè yon emisyon ki rele Ti Koze sou Konpa pito. Donk, si n gen yon pwoblèm pèsonèl avèk nèg lan rezoud li, sepandan mwen panse TT ap goumen pou yon koz ki Nob ke lajan pa ka peye.
Li nòmal pou w santi w friste, paske erè sa TT fè an ka menm fè w mete an kesyon tout sa l te konn di deja, se nòmal. Sepandan, m ap konseye w kite kòlè w pou demen pou w pa di si w te konnen.
