10/12/2024
: Ku muhingamo wo kuri uyu wa kabiri, igenekerezo rya 10 Kigarama 2024, niho haba ibirori vy'ukurahira icese kw’Umushingamateka Nestor Ntahontuye, aherutse kugenwa ngo abe Umushikiranganji w’ikigega ca Reta no gutunganya ubutunzi bw’igihugu. Mu ndahiro yiwe imuha gushikira ayo mabanga, yiyemeje ko atazotirigana ku Masezerano y’ubumwe bw’Abarundi, kw’Ibwirizwa Shingiro rya Republika y’Uburundi n’ayandi mabwirizwa. Mu bindi yiyemeje kandi harimwo ko azoharanira atiziganya ineza y’Uburundi n’Abarundi.
Indahiro yiwe imbere y’Umukuru w’igihugu, imbere y’Inama Nshingamateka n’imbere y’Inama Nkenguzamateka, ikaba yakiriwe na Sentare yubahiriza Ibwirizwa Shingiro rya Repubkila y’Uburundi, nk’uko biri mu ngingo yaryo ya 138.
Ivyo birori vyari vyitabwe kandi n’abandi bubahwa uhereye ku Cegera c’Umukuru w’igihugu, Umushikiranganji wa mbere, Abakurubakuru mu rwego rw’ubutungane, Abakurubakuru mu nzego z’umutekano no kwivuna abansi, Abaserukira ibihugu vyabo n’amashirahamwe mpuzamakungu mu Burundi no mu karere, Abagize Reta y’Uburundi, n’abandi.
