31/05/2024
Mayın 28-də paytaxtdakı “Elmlər bağı”nda III Türk Dünyası Ədəbiyyat və Kitab Festivalı çərçivəsində təşkil olunan “Şeir adam” layihəsinin növbəti qonağı Quba rayonunda yaşayıb-yaradan tanınmış şair Ramiz Qusarçaylı idi. Görüşə şairin ecazkar poeziyasının çox sayda heyranları təşrif buyurmuşdular.
Ramiz Qusarçaylı əvvəlcə ona xas səmimiyyətlə görüşü təşkil edənləri və poeziya həvəskarlarını ürəkdən salamladı. Sonra qısa da olsa, özünün ilk uğurlu qələm təcrübələrindən başlayaraq bir neçə il əvvəl qələmə aldığı və ona böyük oxucu sevgisi və populyarlıq qazandıran “Azərbaycan bayrağı” şeirinədək keçdiyi yaradıcılıq yolundan bəhs etdi.
Şair hər birimiz üçün əziz və doğma olan Şuşanı ötən il ziyarət edən zaman yaşadığı duyğusal anları yada salaraq dedi ki, bu gözəl və bənzərsiz şəhərin düşməndən azad edilməsi hamı kimi, onun da ruhunu səmaların ənginliklərinə yüksəldib. O, özünü şanlı Vətənin xoşbəxt övladı sanır və yazıb-yaratmaqdan zövq alır.
Sonra tarix elmləri doktoru, professor, şair Şahin Fazil çıxış etdi. Dedi ki, Ramiz Qusarçaylı “Şeir adam” adlandırılmağa, həqiqətən, ən çox layiq olan şairlərdəndir. Belə ki, o, vətənpərvərlik keyfiyyətlərindən doğan zəngin mənəvi dünyası, yüksək sənətkarlıq xüsusiyyətləri, mükəmməl yaradıcılıq səriştəsi, araşdırma və təhlil qabiliyyəti ilə seçilən, bütövlükdə, vətəndaş-şair obrazı yaşayan bir sənətkardır.
Azərbaycan Dövlət Pedaqoji Universitetinin Quba filialının baş müəllimi, filologiya üzrə fəlsəfə doktoru, dosent Aytən Qurbanova səhnəyə çıxaraq “Azərbaycan bayrağı” şeirini böyük bir şövqlə oxudu. Yeri gəlmişkən, Aytən xanımın şeiri Azərbaycan bayrağına bürünərək, ucadan ifa etməsi diqqətdən yayınmadı.
Əziz oxucu, necə də əzəmətli səslənir:
“Sənsən Azadlıq eşqim, sənsən Hürr, –deyəcəyəm,
Ən son nəfəsimdə də sənə şeir deyəcəyəm.
Şuşada sən qonduğun daşa pir deyəcəyəm,
Çəkəcəyəm gözümə kölgən düşən torpağı,
Azərbaycan bayrağı!
Azərbaycan bayrağı!”
Milli istiqlalımızın rəmzi olan üçrəngli bayrağımızın çağdaş poeziyamızda, eləcə də Qusarçaylı yaradıcılığında dərin hörmət və ehtiramla tərənnüm edilməsi görüşün əsas leytmotivinə çevrildi. “Azərbaycan bayrağı” şeirinə azı 7 mahnının bəstələndiyi məlumdur. Bu gözəl şeirə ilk melodiyanı isə xalqımızın sevimli müğənnisi, mərhum Məhəbbət Kazımov bəstələyib. Budəfəki görüşdə isə gənc, bəstəkar Anar Bayramlı öz gözəl bəstəsini böyük həvəslə oxudu.
Qusarçaylının qiraət ustası Müşfiqə Baləddinqızının ifasında səslənən lirik şeirləri də şairlə görüşə gələnləri çox duyğulandırdı. Ramiz müəllim həmin axşam bir çox yeni şeirlərini də oxudu.
Son illər Türkiyədə yaşayan həmyerlimiz, şair-tərcüməçi, jurnalist Təranə Musayeva çıxışında Qusarçaylı poeziyasının qardaş ölkədə də sevildiyini bildirdi. Vurğuladı ki, Azərbaycan ədəbiyyatı bu gün dünyanın ən güclü ədəbiyyatlarından sayılmağa layiqdir. Yetər ki, şair və nasirlərimizi layiqincə təqdim etməyi bacaraq.
Sabirabadlı qocaman pedaqoq, hazırda pensiyada olan Səidə Şirinova isə görüşdə söz alaraq fəxrlə bildirdi ki, ötən yaxın illər ərzində onun şagirdləri “Azərbaycan bayrağı” şeirini əzbər söyləməkdən sonsuz zövq alırdılar. Səidə müəllimə düşünür ki, bu şeir ədəbiyyat müntəxabatımızda özünə əbədi yer tutacaq.
Görüşün sonunda Xalq artisti Gülyaz Məmmədovanın ifasında şeir və musiqinin vəhdəti olaraq bir-birindən gözəl mahnılar səsləndirildi.
Bəlkə də bu kiçik yazıya burada nöqtə qoymaq olardı. Amma Ramiz Qusarçaylının tədbirdə haqqında tez-tez söz açılan möhtəşəm “Vətən” poemasını burada xatırlatmamaq günah olardı. Düşünürəm ki, xalqımızın qədim və şanlı tarixininin böyük məharətlə nəzmə çəkildiyi bu parlaq mənzum əsər barədə sadəcə iqtisad elmləri doktoru, professor, yazıçı Əlibala Məhərrəmzadənin səmimi ürək sözlərini yada salmaq kifayət edər. O yazır:
“Mən ustad şair Ramiz Qusarçaylıya belə bir sənət şedevri ortaya qoyduğu üçün hədsiz minnətdarlıq bildirir, eyni zamanda əminlik ifadə edirəm ki, tezliklə bu poema hər bir azərbaycanlının ürəyinə həkk olunacaq. Əsərin son misraları isə dillər əzbəri olacaq:
Vətən!
Bir ürəkdə döyünən candır,
Qarabağ bizimdir, –
Azərbaycandır!
M.HACIXANLI
XQ
