Le Mandat

19/01/2025

🛑 Abasirikare b'Uburundi baja mu ntambara muri Kongo bahembwa gute ? Vyoba bitegekanywa mu masezerano hagati y'ivyo bihugu 2 ? Muri Somaliya hoho? Ivyo ni ibibazo umuvugizi w'igisirikare c'Uburundi Gaspard Baratuza yabajijwe https://www.youtube.com/watch?v=W_0eJw6eDDU

18/01/2025

🛑 Abakwiragiza amasanamu y'abasirikare b'Uburundi boba baguye mu ntambara zo muri Kongo bafise intumbero yo guhahamura Abarundi no guca intege izo ngabo ku bwa Gaspard Baratuza https://www.youtube.com/watch?v=VSu4KEXkbu0

17/01/2025

🛑 Ingene umugambwe MSD ubona ibijanye n'abasirikare b'Uburundi bapfira mu ntambara muri Repuburika ya Demokarasi ya Kongo https://youtu.be/oqCbz0fWQvY

14/01/2025

🛑 Abarundi batatu bapfungiwe mu Rwanda

Abo batatu bapfungiwe i Kigali, umurwa mukuru w'igihugu c'Urwanda, bose bazwi mu gisata co kwidagadura (Music).

Abo ni Hakeem Moza asanzwe akorera ikinyamakuru Akeza.Net mu gisata c'amafoto akongera akaba mu bajejwe gukurikirana ibikorwa vy'abaririmvyi bari mu mugwi Bilimani Boy, Abdi Nour Vuitton nawe nyene ari mu bajejwe gukurikirana ibikorwa vy'umugwi Bilimani Boy hamwe na Mike ajejwe abatamvyi b'uwo mugwi nyene (danseurs).

Abo bose uko ari 3 bafashwe igenekerezo rya 26 Kigarama 2024 bari mu Rwanda aho bari bagiye gufasha gutegura igiteramo umwe mu baririmvyi ari mu mugwi Bilimani Boy, Kirikou Akili yari yatumiwemwo na mugenziwe Kivumbi King banaririmbanye.

Muri ico giteramo cabaye kw'igenekerezo rya 28 Kigarama 2024, umuririmvyi Kirikou Akili ntiyabonetsemwo ahubwo yaciye yandika ikete ryo gusaba imbabazi abakunzi biwe kubera ko ataririmvye. Muri iryo kete, Kirikou Akili asigura ko icatumye asiba ari uko hari ivyo batumvikanyeko mw'itunganywa ry'ico giteramo bari bise "Ganza Kigali".

Kugeza ubu itororokanirizo ry'amakuru "Le Mandat" ntiriramenya ico iyo misore 3 ipfungiwe.

Ni inkuru tubandanya tubatohoreza.

Kw'ifoto itangura, muri abo babiri bahagaze, Hakeem Moza ari i bubamfu, Abdi Nour Vuitton ari i buryo.

13/01/2025

🛑 Umugwi wa FC Barcelona niwo waraye utahukanye igikombe ca Supercoupe mu gihugu ca Espagne utsinze umugwi wa Real Madrid ibitsindo 5 kuri 2.

Ibitsindo vya Barcelona vyatsinzwe na Lamine Yamal, Robert Lewandowski, Raphinha hamwe na Balde.
Real Madrid ikaba ariyo yatanguye gutsinda ku munota wa gatanu w'urukino biciye ku musatirizi w'umufaransa Kylian Mbappé, ikindi gitsindwa na Rodrygo Goes.

Supercoupe kikaba ari igikombe gihiganirwa n'umugwi wabaye uwa mbere mw'ihiganwa rya Espagne n'umugwi watahukanye igikombe citirirwa umwami muri ico gihugu.

13/01/2025

🛑 Adolphe Itangishaka, umunywanyi wa CNL ku Mutanga yoba yarishwe?

Abanywanyi babiri b’umugambwe CNL bakora mu kabare “Kwa Mbagwa” muri karitiye Mutanga Sud iri muri zone Rohero yo muri komine Mukaza mu gisagara ca Bujumbura barakubiswe barashaya n’imbonerakure mw’ijoro ry’uwa 24 ushira uwa 25 Kigarama 2024 nk’uko twari twabishikirije. Umwe muri bo yitwa Adolphe n’ubu ntarasubira kuboneka. Hari amakuru avuga ko yoba yarishwe. (Le Mandat)

Abanyagihugu bo muri karitiye Mutanga Sud baheruka kubona Adolphe Itangishaka ashorewe n’abaporisi bari kumwe n’imbonerakure mw’ijoro ryo ku wa 24 ushira uwa 25 mu kwezi kw’12 muri uwu mwaka uheruka kurangira w’2024 akuwe mu kabare yakoramwo k’umukozi wo mu nama nkenguzamateka batazira Mbagwa. Hafi indwi zitatu zikaba zigiye guhera uwo munywanyi w’umugambwe CNL ayoboka Agathon Rwasa atarasubira kuboneka. Bamwe mu banyagihugu bavuga ko Adolphe Itangishaka yoba yarishwe.

Bakubiswe n’imbonerakure ari babiri

Adolphe Itangishaka w’imyaka 27 na Magnus Nimbona w’imyaka 29 bakora bose uko ari babiri mu kabare ka Kwizera Dieudonné batazira Mbagwa asanzwe ari umushoferi mu nama nkenguzamateka, akaba akorera n’iperereza ry’Uburundi.

Ababibonye bavuga ko hari nk’isaha indwi z’ijoro ry’uwo musi wa kabiri ushira uwa gatatu igihe imbonerakure zirimwo Egide, Thierry na Bosco zinjira muri ako kabare zitangura kubakubita zivuga ko zibahora ko ari abayoboke ba Agathon Rwasa.

Ayo makuru amenyesha kandi ko abaporisi bari barongowe n’uwo batazira Wanyenyi baciye bahashika abo banywanyi babiri ba CNL babaye intere, baca bafadikanya n’izo mbonerakure mu kubajana ahatamenyekanye nk'uko twari twavyanditse mu nkuru iheruka.

Gushika ubu, Adolphe Itangishaka, yari asanzwe ajejwe ivyo muri ako kabare (gérant), ntarasubira kuboneka inyuma y’aho ashorerewe n’izo mbonerakure ziri kumwe n’abo baporisi.

Inkuru yose mushobora kuyisoma mufyonze aha hepfo

Abanywanyi babiri b’umugambwe CNL bakora mu kabare “Kwa Mbagwa” muri karitiye Mutanga Sud iri muri zone Rohero yo muri komine Mukaza mu gisagara ca Bujumbura barakubiswe barashaya n’imbonerakure mw’ijoro ry’uwa 24 ushira uwa 25 Kigarama 2024 nk’uko twari twabishikirije. Umwe muri bo yi...

13/01/2025

🛑 Abakenyezi babiri baheruka kwicwa barashwe n'abacungera ikirimba c'umukuru w'igihugu Evariste Ndayishimiye i Kiriri ni Espérance Sinzokira batazira Mahereni hamwe na Francine Niyonzima, bose baturuka ku mutumba Kirombwe wo muri zone Muyira muri komine Kanyosha iri mu ntara ya Bujumbura bita Bujumbura rural.

Abo bakenyezi bari basanzwe badandaza isombe kw'isoko ya JABE mu gisagara ca Bujumbura nk'uko twari twabibashikirije mu nkuru iheruka, boba bahowe ko batevye guhagarara igihe abo bajejwe umutekano w'umukuru w'igihugu babahagarika.

Murashobora gusoma inkuru yose mufyonze aho

Abakenyezi babiri bishwe barashwe n’abacungera umukuru w’igihugu ku kirimba ciwe i Kiriri kw’igenekerezo rya 28 kigarama 2024 ni Sinzokira Espérance batazira Mahereni hamwe na Niyonzima Francine, bose baturuka ku mutumba Kirombwe wo muri zone Muyira muri komine Kanyosha iri mu ntara ya Bujumb...

12/01/2025

🛑 Umusaraba w'icuma wo kw'Iseminari Nkuru yitiriwe Umweranda Yohani Paulo wa Kabiri y'i Gitega wibwe

Ubuyobozi bw'iyo seminari (Grand Séminaire Interdiocésain Saint Jean-Paul II) busaba ko uwo wese yomenya umuntu yivye uwo musaraba canke akumva aho bariko barawugurisha yoca abibumenyesha canke abimenyeshe Patiri Mukuru wa Paruwase imwegereye.

Ubuyobozi bw'iyo seminari bwibutsa ko ikibanza uwo musaraba wari ushinzwemwo i Songa gifise akamaro n'agaciro kanini kuko ngo niho "Umweranda Yohani Paulo wa Kabiri yasomeye imisa igihe yaja mu mu 1990".

12/01/2025

🔴 Umuntu umwe yaraye yishwe arashwe n'igiporisi hamwe n'imbonerakure zo muri zone Nyakabiga komine Mukaza mu gisagara ca Bujumbura

Amakuru dukesha abajejwe intwaro yemeza ko uwo yarashwe yari mu mugwi w'abasuma bariko biba intsinga z'amatara ari kw'ibararaba Avenue de l'imprimerie benshi bita Avenue de la mort.

Abo basuma biba izo ntsinga barinze kuzizura mu kuzimu bakaba bageramiwe kuko hamaze gupfa abarenga 3 mu kiringo gito. Uwaheruka gufatwa imvura iriko iragwa akaba yatwawe ahantu hataramenyekana n'ubu nta wuzi irengero ryiwe.

11/01/2025

🛑 Uburundi bwunguka iki mu kurungika abasirikare muri Repuburika ya Demokarasi ya Kongo? Ico ni kimwe mu bibazo babajije Révérien Ndikuriyo https://youtu.be/C4u3-3k00wA

11/01/2025

🛑 Révérien Ndikuriyo asigura ibijanye n'ubwato bwitwa Millenium abarwanyi ba CNDD-FDD ngo bakoresheje mu ntambara https://youtu.be/m74TxJY6Re4

08/01/2025

🔴 Urunani BURUNDI BWA BOSE ruhawe imisi 3 yo gutanga intonde nshasha

Sentare ijejwe kwubahiriza ibwirizwa shingiro mu Burundi ihejeje gutanga ikiringo c'imisi itatu ngo urunani rw'imigambwe "Burundi Bwa Bose" rube rwatanze intonde nshasha z'abashingamateka bazoserukira urwo runani mu matora ya 2025.

Iyo sentare ikaba yabategetse gukura ku ntonde abashingamateka bakomoka mumugambwe CNL harimwo umushingamateka Agathon Rwasa.

Sentare kandi ikaba yasavye umugambwe CNL wemewe n'ubutegetsi gutanga intonde zikwije ibisabwa bitarenze imisi itatu nyene ku rwego rw'abashingamateka kuko intonde z'uwo mugambwe nazo nyene zari zanswe na CENI.

08/01/2025

🛑 Igiciro c'ubushaza cagabanutse cane

Mu masoko atandukanye yo mu gisagara ca Bujumbura, igiciro c'ubushaza bubisi caragabanutse cane.

Ubu nko mw'isoko ya COTEBU, ikiro c'ubwo bushaza kigurwa amafaranga ari hagati y'ibihumbi bine (4000) n'ibihumbi bine n'amajana atanu (4500).

Mu yandi masoko canke kuri barya batembereza usanga ikiro c'ubushaza ari ibihumbi bitanu (5000).

Ivyo biri uko mu gihe mu ndwi yanyuma y'umwaka wa 2024, ikiro c'ubushaza cagurwa ibihumbi cumi na bitanu (15000). Mu kwezi kwa 11, ikiro c'ubushaza cagurwa amafaranga ari hagati y'ibihumbi mirongo ibiri n'umunani (28000) n'ibihumbi mirongo itatu (30000).

08/01/2025

🛑 Révérien Ndikuriyo ngo imigenderanire hagati y'Uburundi na Kongo, Urwanda rubijamwo gute? FDLR ngo ni icitwazo https://youtu.be/vblTGpoEZsk

07/01/2025

🛑 Umuririmvyi w'Umurundi azwi kw'izina rya DJ Fernando azoshira ahabona indirimbo "Bellisima Remix" yaririmbanye n'umuririmvyi azwi cane mu gihugu ca Uganda Eddy Kenzo kuri uyu wa gatanu.

Iyo Ndirimbo izoba isubiwemwo, Eddy Kenzo ubwiwe niwe yabitangaje aciye ku muhora wa Facebook.

Bellisima ya mbere niyo yatumye uwo musore avuka mu ntara ya Gitega atahukana intsinzi mw'ihiganwa rya "Isanganiro Award", akaba aheruka kuvuga ko agiye gushinga urwiwe n'uwo yakunze ari nawe yise Bellisima.

07/01/2025

🛑 Abantu 4 bahitanywe n'amasanganya

Abagabo 3 n'umukenyezi 1 nibo itororekanirizo ry'amakuru Le Mandat ryamenye ko bahitanywe n'amasanganya mu ntara zitandukanye kuri uno wa kabiri igenekerezo rya 7 Nzero 2025.

Batatu bambere bapfuye bagonzwe n'imodoka ya gisirikare bita kizunguzungu muri komine n'intara ya Muyinga. Uwundi nawe yagonzwe n'imodoka yo mu bwoko bwa Dina muri zone ya Bitare komine Mutaho intara ya Gitega.

Tubamenyesheko abo bitavye Imana bose bari kumapikipiki.

07/01/2025

🛑 Igiciro c'ivoka caduze cane mu gisagara ca Bujumbura

Mu makaritiye yo mu gisagara hagati muri komine Mukaza ivoka ntoya igurwa amafaranga ari hagati y'ibihumbi bibiri (2000) n'ibihumbi bitatu (3000). Ivoka nini nayo ni ibihumbi bitanu (5000).

Mu yandi makaritiye naho zaraduze igiciro ku buryo iyahora igurwa amajana atanu (500) ubu ari igihumbi (1000).
Ibitari bimenyerewe ni uko ivoka nini naho nyene igurwa ayashika ibihumbi bitatu (3000).

Abadandaza baganiriye n'itororokanirizo ry'amakuru Le Mandat bemeza ko nabo aho bazirangura ari mbisi ziba zizimvye.

Nk'akarorero, imodoka yo mu bwoko bwa Probox yuzuye amavoka aho bita muri kapo, ubu igeze ku mafaranga arenga ibihumbi amajana atandatu (600.000) mu gihe yahora ku bihumbi amajana abiri na mirongo itanu (250.000).

Ikindi kivyunyura ni ikena ry'igitoro hamwe n'uko ahahora hava ivoka nyinshi mu ntara za Rutana, Ruyigi, Cankuzo, Kirundo hamwe na Gitega ubu zishoka ku bwinshi mu gihugu kibanyi ca Tanzania.

Mwokwibuka ko Reta ya CNDD-FDD iheruka gufata ingingo y'uko igiterwa c'ivoka kiba njabukamazi, ivyatumye haterwa imivyaro y'ivoka itari mike mu mpera z'umwaka uheze w'2024.

07/01/2025

🛑 Révérien Ndikuriyo ati "muri abo bambaye impuzu zera canke amakoti harimwo abakorana na Shetani"

Umunyamabanga mukuru w'umugambwe CNDD-FDD yariko yishura ikibazo kijanye n'abategetsi basaba igiturire abipfuza kuzana imitahe mu Burundi https://www.youtube.com/watch?v=z2C1QV17G8A