30/10/2021
زه د افغانستان د کرکټ ملي لوبډلې پر بایللو یوه ذره هم نه یم خفه!
زه د افغانستان د کرکټ ملي لوبډلې پر ماتې چې د پاکستان د کرکټ ملي لوبډلې له خوا تېره ورځ ورکړل شوه یا ماته شوه، یوه ذره هم نه یم خفه، بلکې پرې ویاړم. خفه دې ته یم چې زموږ هېواد وال ولې دوی په دغه کړکېچنو حالاتو کې په کنځلو او بدو خبرو ... نازوي؟
زموږ ملي لوبډله تر زیات ذهني فشار لاندې ده، موږ باید دوی تشویق کړو نه دا چې ذهني فشار یې لا زیات کړو.
په لوبه کې ګټل او بایلل شته دي؛ ګټل او بایلل د یوې سکې دوه مخه دي، موږ باید دا دواړه حالته د لوبې نه مخکې او د لوبې په جریان کې په نظر کې ونیسو، په هغه لوبه کې چې ستا د ګټلو چانس ستا د مقابلې لوبډلې څخه زیات وي، هغه لوبه نه لوبه ده، په هغه لوبه کې چې ستا د ګټلو چانس کم وي، لکه د افغانستان د ګټلو چانس چې د پاکستان د لوبې پر وړاندې مخکې له مخکې یې وړاندوینه شوې وه کم و، د داسې لوبې کتل او اورېدل بیا بېل کیف او خوند کوي.
زموږ ملي لوبډلې نسبتا د هندوستان او نېوزیلنډ څخه ښه لوبه وکړه، دا چې لوبغاړو تېروتنې او سهوې وکړې لوبه د پاکستان د ملي لوبډلې په ګټه پای ته ورسېده، هېره دې نه وي چې ملي لوبغاړو بهترینه لوبه وکړه، موږ ته یې دغه پیاوړې مبارزه تر کټلو ډېر اهمیت لري، ان شاء الله چې په راتلوونکو کلونو کې به نه ماتېدونکې لوبډله وي.
د ملي لوبډلې د لوبغاړو تېروتنې او سهوې باید په سړه سینه ومنو، هغوی هم زموږ او ستاسو په شان انسانان دي، تېره ورځ د جنرال مبین خبرې، د ګران هېواد دا نامعلوم برخلیک، د پرمختللو وسایلو کمی، د تکړه روزنکو نشتون او داسې نور په سلهاوو مشکلات زموږ د ملي لوبډلې د بریا په لار کې لوی خنډونه دي، که چېرته موږ د ذهني پلوه لوبې ته چمتو ونه اوسو جسمي تیاری یا پیاوړتیا هېڅ ګټه نلري او نه مو کوم درد ته درمان کېدای شي.
زموږ په ټولنه کې دا ډېر بد دود دی؛ کله مو چې لوبډله لوبه وګټي تشویقوي یې او کله یې چې وبایلي بیا ورته کنځلې او بدې خبرې کوي، د دوی د سپکولو لپاره سره لاسونه ورکوو، ولې؟ که د لوبې له بایللو وروسته د دوی د سپکولو، کنځلو، بد خبرو... پر ځای بیا هم دوی تشویق کړو، آیاد دا به بده وي؟
موږ باید په دواړو حالتونو کې خپل لوبغاړي تشویق کړو.
ولې موږ دوی د خپلو ځانونو په شان درک نه کړو؟
ولې موږ داسې یو، ولې موږ داسې کوو؟؟
زموږ لوبغاړو خپلې ټولې هڅې د لوبې د ګټلو لپاره وکړې، خو چې ومو نشوای کولای چې لوبه په خپله ګټه پای ته ورسوو دا زموږ د لوبډلې بدمرغي او د مقابلې لوبډلې نېکمرغي وه.
موږ ماتې ته ولې د شرم په سترګه ګورو، ولې د یوې تجربې په سترګه نه ورته ګورو؟!
پاکستان چې د هندوستان په شان، نېوزیلنډ په شان پیاوړو لوبډلو ته ماته ورکولای شي، نو موږ چې د دوی په شان نه دومره زیات امکانات لرو او نه د ذهن دومره ارامتیا لرو چې لوبه دې وګټو، بیا هم وایم؛ چې موږ ولې ماتې ته د شرم په سترګه ګورو، ولې د تجربې په سترګه نه ورته ګورو.
په هر صورت موږ باید خپل احساسات کنټرول کړو، په هر وخت او هر حال کې باید خپل ملي لوبغاړي او خپله ملي لوبډله تشویق کړو و یې هڅوو تر څو له ماتې نه تجربه واخلي او نورې لوبې راته وګټي.
اوس زموږ فوکس باید په تېره لوبه نه وي زموږ فوکس اسو باید په راتلونکو لوبو وي.
د ملي لوبغاړو او ملي لوبډلې تر شا د غره په شان ودرېږﺉ، تشویق یې کړﺉ. موږ یې په هر صورت کې حمایت کوو او دوی مو د افتخار سمبولونه دي موږ پرې ویاړو.
په اخر کې دا ویل غواړوم:
زموږ په ټولنه کې ستر مصببت دا دی؛ کله چې د چا ستاینه کېږي، ټول به غلي ناست وي او د هېڅ ځایه به د بل چا غږ نه اورې، خو کله چې د چا بد یاد شي د هر ځایه نه به خدایي خدمتګاران را پیدا شي او خبرې به ورپسې شروع کړي.
#شبانه دوران
ــــــــــــــــــــــــــــــــ
د یوه تلپاتي، خوشحاله، سوکاله، آرامه، باسواده او ويښ ګران هېواد افغانستان په هیله!
ــــــــــ
لیکنه: مطیع الله ''صاحب زاده''
