27/03/2024
شاعره غوټۍ خاورې!
خبرياله ، شاعره، نطاقه او څېړونکې، ارواښاده غوټۍ خاورې !
لیکواله او څيړونکې غوټۍ خاورې په ۱۳۴۰لمریز لیږدیز کال کې د ننګرهار ولایت د روداتو په ولسوالۍ کې زېږېدلې ده، اغلې خاورې د شاولي خان خاورې لور او د عبدالغفار خان لمسۍ ده.
خپلې لومړنۍ او د لېسې زده کړې یې د رابعې بلخي په لېسې کې پای ته رسولي . وروسته د کابل پوهنتون د ژبو او ادبياتو له پوهنځي څخه د پښتو ادبياتو له څانگې د لسانس بری لیک اخیستی او بيا يې خپله ماسټري هم ترسره کړې .
په ۱۳۵۷ کال کې يې د وخت له راډيو تلويزيون سره د نطاقې په توګه همکاري راپيل کړه چې ډېر ژر د وياندۍ لوړو مدارکو ته ورسېده
د آغلې دندې له ۱۳۶۳م لمریز څخه د زېري جریدې مرستيالې مسولې په توگه پیل شوي او بيا د علومو اکاډمۍ د فلکلور او گړنيزو ادبياتو د ديپارټمنټ غړې شوه . په ۱۳۶۵م لمریز کې د همدې ډيپارټمنټ پازواله شوه چې وروسته بيا د کابل مجلې چلوونکې ، د باختر آژانس د پښتو څانگې د رسنیو کارکوونکې او غړې هم وه . په رسنیو کې د خبريالې او څېړونکې په توگه هم کار کړی .
ارواښادې غوټۍ د پښتو فلکلوریک ادب په برخه کې څیړنې کړې دي چې په همدې برخه کې ۶ غوره اثار خپاره کړي دي او یو اثر یې لا خپور شوی نه دی.
١- د پښتو شفاهي ادبيات ـ بڼه او مضمون چاپکال ۱۳۶۶لیږدیز لمریز
٢- د پښتني فولکلور جامع کتابښود
٣- د ننگرهار نکلونه
٤- پښتو لنډۍ له يوې څیړنیزې سریزې سره
٥- په پښتو شفاهي ادبياتو کې د ښځې د ټولنیز دريځ انعکاس
٦- کجاوې د لڼدو کیسو ټولگه
زموږ دغه قدرمنه خور دوه کاله مخکې د اپریل پر څلورمه نېټه د ورپېښې ناروغۍ له امله له دې فاني نړۍ څخه د تل لپاره سترګې پټې کړې ۔ الله دې جنتونه ورکړي ۔ یادونه یې تلپاتې ۔ ( یوسف هېواددوست ۔ له ډنمارک څخه د افغان غږ راډیویي مجله )۔
