19/02/2024
زموږ د کرکټ ټیم له کوم نامعلوم، ژور فشار سره مخ دی!
که حافظه مو درسره مرسته کوي نو زموږ کرکټ له هغې ورځې خراب شو چې د ټیم درې غوره لوبغاړي مو ظاهراً د ډسپلین له سزا سره مخ شول او کرکټ بورډ ورته د ملي ګټو نوم ورکړ.
په عین وخت کې د راشدخان ورور د پاکستاني استخباراتو له خوا په پېښور کې تښتول شوی و، چې ما یې د کورنۍ د غړی له خولې کیسه لیکلې وه او دا مې ویلي وو چې زموږ کرکټ بورډ ته له ګاونډ نه د ټیم د نړولو نورې دندې هم ورکړل شوې دي؛ خو خلکو پرې راته بد رد وویل.
یو داسې کرکټ بورډ چې اجراییوي رییس یې له دې دندې مخکې د پاکستان په مري کې د کریاڼې دوکاندار و او اوس د یوه ډيکټاټور له خوا په زور په دغه څوکۍ کېنول شوی؛ څنګه دې امکان ولري چې د فرمایشاتو پر ځای دې ملي ګټو او مسلکیتوب ته ژمن وي؟
سږ کال PSL د افغان لوبغاړو له ګډون پرته پیل کېږی.
د یادو بندیزونو وروسته مو یو سیریز څه چې یوه لوبه مو هم ونه ګټله.
د نولس کلنو نړیوال جام ته داسې لوبډله انتخاب شوه چې نیپال ته هم ماته شوه.
په کورنیو لوبو کې څو څو ځله ځلیدلي لوبغاړي په کور ناست او یوه ګډه وډه، بې نظمه او عین حال کې منجمده لوبډله په درې واړو فارمټونو کې لوبېږي او مسلسله ماتې خوري.
د راشد د عملیات جزییات او د مجیب د زخمي کېدا معلومات د اشد محرم غوندې له مینهوالو پټ ساتل کېږي.
د روانو مهمو سیریزونو په جریان کې ملي لوبډلې د مشر روزونکي جانتن ټرات غیرحاضر/ رخصت دی.
بيټسمینان د رواني فشار ښکار دي او ممکن له مختلفو ګواښونو سره مخ وي خو راشد، مجیب، نوین، فاروقي او نور هغه لوبغاړي چې په نړیوال جام کې وځلېدل او بالخصوص د پاکستان د ماتې سبب وګرځېدل یا خو څنګ ته ساتل کېږي او یا په لوبډله کې وړاندې وروسته لوبول کېږي او له ماتو او شرمونو سره یې مخ کوي.
بیا هم وایم چې ما ته له مدیریت زیاته دا کیسه استخباراتي ښکاري او ممکن د وخت په تېرېدو دا زخم پړسوب وکړي او راښکاره شي خو بیا به وخت له وخته تېر وي.
په نړیوال جام کې د افغانستان د کرکټ ټيم له خوا د پاکستان ماتېدل یو تصادف و خو اوس زموږ د ټیم پارچه پارچه کېدل راته پلان ښکاري.
زما نظر ممکن سل په سلو کې سم ونه اوسي، خو که د ټیم جوړښت، د لوبېدونکو لوبغاړو کمبینیشن، د دوی تر منځ ناهمغږي او نورو نیمګړتیاوو ته په کتو کوم نالیدونکی ځواک راته ښکاري چې دا هر څه یې تر فشار لاندې نیولي دي.
بسم الله کړئ، بد رد راته ووايئ!
لیکنه : Ziarmal Afghan
